21.08.2015 01:20

გაიცანით: ყველაზე მძლავრი C-კლასი კუპე!

უფრო ძლიერი, უფრო განიერი და უფრო სწრაფი: ”მერსედესი” ფრანკფურტის ავტოშოუზე (17-დან 27 სექტემბრამდე) ახალ C-კლას კუპესთან ერთად მის AMG-ვერსიასაც წარმოადგენს — გაიცანით: Mercedes AMG C 63 Coupé!

”მერსედესმა” ტრადიციულად უდიდესი თავდაჯერებით გამოაცხადა, რომ ეს V8-ბოლიდი ”ყველა დროის ყველაზე სპორტული C-კლასი” იქნება. მისი გაყიდვები 2016 წლის მარტიდან იწყება და AMG C 63 Coupé ორი ვერსიით იქნება წარმოდგენილი (C 63 და C 63 S). შეგვიძლია ვივარაუდოთ, რომ C 63-ის საწყისი ფასი დაახლოებით 70 000 ევრო იქნება, ხოლო C 63 S-ის კი — 77 000 ევრო.

C-კლასის ჩვეულებრივი კუპესგან განსხვავებებს ფოტოებზე მაშინვე შენიშნავთ. AMG-სთვის დამახასიათებელი დეტალების გარდა აღსანიშნავია ის, რომ წინ სიგანე 64 მილიმეტრით მეტია, უკან კი — 66 მილიმეტრით მეტი. სპეციალურად AMG-Coupe-სთვის გაუმჯობესდა სავალი ნაწილი, უკანა ღერძს კი დიფერენციალის მექანიკური ბლოკირება ექნება. ამასთან ერთად, აღსანიშნავია ისიც, რომ ინჟინრებმა ამ მოდელს 3-საფეხურიანი ESP უსახსოვრეს: ESP ON, Sport Handling Mode და ESP OFF.

კაპოტის ქვეშ ნაცნობი 4-ლიტრიანი V8-Biturbo იმუშავებს, რომელიც AMG GT-საც ემსახურება. C 63 Coupé-ში V8-ძრავას ან 476 ცხენის ძალა აქვს (ჩვეულებრივი ვერსია), ანაც 510 ცხენის ძალა (C 63 S). სწორედ ამ უკანასკნელით (S-ვერსია), C-კლასი კუპე 100 კმ/სთ-ს 3,9 წამში განავითარებსო — გვპირდებიან შტუტგარტელები. ვისთვისაც 250-კმ/სთ-იანი მაქსიმალური სისწრაფე ცოტაა (იზღუდება), შეუძლია ოფციური AMG Driver's Package შეუკვეთოს და მაქსიმალურ სისწრაფეს 290 კმ/სთ-ს მიიღებს. გადაცემათა კოლოფი 7-საფეხურიანი ავტომატიკაა.

ტექნიკური მონაცემები*

Mercedes-AMG C 63 Coupé

Mercedes-AMG C 63 S Coupé

ძრავა

ბენზინის V8 Biturbo

მოცულობა

3982 სმ3

სიმძლავრე

476 ცხ. ძ./5500-6250

510 ცხ. ძ./5500-6250

ბრუნის მომენტი

650 ნმ/1750-4500